Müəllimlərin tam ştatla, yəni gündə 8 saat məktəbdə qalmaqla işləməsi barədə müzakirələr təhsil sistemində yeni mərhələnin başlanğıcını göstərir. Nazirliyin açıqlamasına görə, proses ilk növbədə böyük məktəblərdə tətbiq ediləcək. Bu, ilk növbədə Bakıda və bir sıra rayonlarda fəaliyyət göstərən məktəblərə təsir edəcək.
Təhsil sahələri üzrə tədqiqatçı Elmin Nuri Modern.az-a açıqlamasında bildirib ki, 8 saatlıq iş qrafiki daha çox Bakı, ondan sonra isə Sumqayıt və Abşeron kimi böyük şəhərlərdəki məktəblərdə tətbiq edilə bilər. Bu yeniliyin reallaşması üçün məktəblərin də həm həcmcə böyüklüyü, həm də texniki-təşkilati cəhətdən üstünlüyü çox vacibdir.
"Bu kimi məktəblərdə seçilmiş müəllimlər yeni qrafikə əsasən artıq dərslərini bitirən kimi deyil, məhz iş saatı başa çatdıqdan sonra məktəbdən çıxa bilərlər. Bu isə əlavə imkanlar, şərait tələb edir. Çünki günlük dərsini başa vuran müəllim 8 saatlıq iş qrafikinin digər tələbləri istiqamətində də hərəkət etməlidir. Məsələn, o sabahkı dərslərin plan-proqramını hazırlamalı, mövzularla bağlı çalışmalı, üstəlik, şagirdlərlə fərdi formada əlavə hazırlıqları təşkil etməli, üstəlik bəzi hallarda valideynlərlə ünsiyyət saatı təşkil etməlidir. İndi bütün bunların həyata keçməsi üçün müəllimin məktəbdə hər hansı imkanları olacaqmı?! Baxın, bu sualın cavabında çox ciddi çətinliklər yaranacaq. Odur ki, ilkin mərhələ üçün yalnız pilot məqsədli iri məktəblərin seçilməsi gözlənilir ki, nazir də məhz bu detala toxundu" - deyə o qeyd edib.
E.Nuri bildirib ki, Bakı şəhərində bu əsnada seçim o qədər də çətin olmayacaq. Çünki burada qeyd olunan meyarların təşkili üçün tələblərə cavab verən məktəblər var.
"Regional təhsil idarələri üzrə hərəsindən bir neçə mərkəzi məktəbin seçilməsi də gözlənilə bilər. Məsələn, Astara -Lənkəran Regional Təhsil İdarəsinə tabe olan məktəblər arasında qurumun çərçivəsindəki rayonların hərəsindən bir böyük məkəb seçilə bilər".
Ekspert qeyd edib ki, bu sistemin kənd məktəblərində tətbiqi gözlənilən deyil:
"Bu layihənin ilkin olaraq kənd məktəblərində tətbiqini gözləmirəm. Mümkün olmasına sözsüz ki, mümkündür. Amma pilot xarakterli ilkin mərhələdə bu o qədər də inandırıcı görünmür. Təsəvvür edin, bunun tətbiqi üçün müəllimlərin əlavə gözlənti otağı, fərdi hazırlıqlar üçün kabinetlər və s. lazımdır. Mən hələ xaricdəki təcrübədən çıxış edərək, əlavə istirahət otaqları, meeting-room"sları və s. demirəm. Onlardan danışmaq ümumiyyətlə absurddur. Bir sözlə, son olaraq bunu deyə bilərəm ki, 8 saatlıq iş qrafiki tamam-kamal, öz qaydalarına uyğun təşkil olunacaqsa, buna cavab verən məktəblərimizin sayı o qədər də çox olmayacaq".
