Sumqayıtın ən gediş-gəlişli yerlərindən birində dayanacaq “yoxa çıxıb”.
Sumqayit24.az-a müraciət edən yerli sakinlərin iddiasına görə, Koroğlu prospekti, 10-cu mikrorayonda yerləşən həmin dayanacaq “Tort Sumqayıt” mağazasının sahibi tərəfindən ləğv edilib.
“Sahibkar ticarət obyektinin önünün açıq olması səbəbindən bu qeyri-qanuni yola baş vurub. Dayanacağın ləğvi isə sərnişinləri günün altında, yağışda, küləkdə dayanıb avtobus gözləməyə məcbur edir. Nəzərə almaq lazımdır ki, körpəli analar, yaşlı insanlar tez-tez ictimai nəqliyyatdan istifadə edirlər.
Mağaza sahibi hər kəsin yanında dayanacağın onun istəyi ilə yığışdırıldığını deyib”, - deyə iddiada bildirilir.
İddianın doğru olub-olmadığını öyrənmək üçün Sumqayıt Şəhər İcra Hakimiyyətinin mətbuat katibi Eyvaz Qocayevlə əlaqə saxladıq. Qocayev deyilənləri təkzib edib:
“Sumqayıt şəhərində baxımsız vəziyyətdə olan dayanacaqlar yenisi ilə əvəz olunur. Sözügedən əraziyə yeni dayanacaq qoyulacağı üçün köhnəni yığışdırıblar. Bu günlərdə həmin yerdə yeni dayanacaq quraşdırılacaq”.
