Sumqayıt şəhər 34 nömrəli məktəbdə 8-10-cu sinif şagirdləri ilə görüş keçirilib.
Sumqayit24.az xəbər verir ki, Abşeron-Xızı Regional Təhsil İdarəsinin Tədrisin Keyfiyyəti Sektorunun aparıcı məsləhətçisi Elşən Ramizoğlu onlara “BilBacar” müsabiqəsindən danışıb. Bildirib ki, müsabiqədə respublikanın bütün ümumi təhsil müəssisələrinin 8-10-cu sinif şagirdləri iştirak edəcəklər.
Müsabiqənin ilk mərhələsi virtual platforma üzərindən 2024-cü ilin oktyabr ayından 2025-ci ilin may ayınadək keçiriləcək. İkinci mərhələnin isə 2025-ci ilin iyun ayında əyani formada keçirilməsi planlaşdırılır. Platformada ay ərzində aktiv olan “Hazırlıq” bölməsi şagirdlərin suallarla məşq edərək “Yarış”a hazırlığını təmin edəcək. Şagirdlər istənilən məkanda və müxtəlif zamanlarda kompüter, planşet və ya mobil telefon vasitəsilə daxil ola biləcəklər.
Hər iki bölmə üzrə (“Hazırlıq” və “Yarış”) ayrı-ayrılıqda şagirdlərə 60 sual (riyaziyyat-20 sual, oxu-20 sual, təbiət elmləri-20 sual) təqdim ediləcək. Suallar hər ay yenilənəcək.
Müsabiqənin keçirilməsində məqsəd şagirdlərin məktəbdə qazandıqları bilik və bacarıqlardan istifadə qabiliyyətini inkişaf etdirmək və həmin bacarıqların real həyatda tətbiqinə sövq etməkdir.
Sonda suallar cavablandırılıb və fikir mübadiləsi aparılıb.
