Sumqayıtda güzəştli şərtlərlə satılmış mənzillər üzrə gözləmə qaydasında seçim dekabrın 10-dan 14-dək həyata keçiriləcək.
Sumqayit24.az xəbər verir ki, bunu Mənzil İnşaatı Dövlət Agentliyinin (MİDA) Beynəlxalq Əlaqələr və Strateji Planlaşdırma Şöbəsinin müdiri Cəmşid Əmirov jurnalistlərə açıqlamasında deyib.
"Vətəndaşlar seçilmiş mənzili gözləmə qaydasında seçə bilərlər. Əgər ilkin seçim edən şəxs mənzili əldə etməzsə, bu mənzil növbəti vətəndaşa təklif ediləcək. Sistem tam şəffaf işləyir və indiyə qədər hər hansı problem müşahidə olunmayıb", - C.Əmirov qeyd edib.
Onun sözlərinə görə, bu satışda əlavə təhlükəsizlik tədbirləri tətbiq olunub:
"Bunun əsas məqsədi mənzil seçiminin qanunsuz sürətləndirilməsinin qarşısını almaqdır. Prosesin təhlükəsizliyini təmin etmək üçün xüsusi tədbirlər görmüşük və sistemdə hər hansı müdaxilənin qarşısı tamamilə alınıb".
C.Əmirov xatırladıb ki, Sumqayıt Yaşayış Kompleksində 392 mənzilin satışına saat 11:00-da başlanılıb:
"Bu gün satışa çıxarılan mənzillər qısa müddət ərzində vətəndaşlar tərəfindən seçildi. Əksər hallarda mənzil sifarişi uğurla tamamlandı. Agentliyin fəaliyyəti dövründə ümumilikdə bu günə qədər 16 satış həyata keçirilib. Güzəştli mənzil sistemində isə 38 mindən çox vətəndaş qeydiyyatdan keçərək elektron kabinet əldə edib. Bu satışda da vətəndaşların aktiv iştirakı bizi sevindirdi".
