Abşeron-Xızı Regional Təhsil İdarəsi üzrə təhsil işçilərinin sentyabr konfransı keçirilib.
Sumqayıt24 xəbər verir ki, Sumqayıtda baş tutan iclasda Elm və Təhsil Nazirinin müavini Firudin Qurbanov, Azərbaycan Respublikası Təhsil İnstitutunun direktor müavini İlham Cavadov, Sumqayıt Şəhər İcra Hakimiyyətinin başçısı Zakir Fərəcov, Abşeron- Xızı Regional Təhsil İdarəsinin müdiri İlhamə Abdullayeva, aidiyyəti idarə, müəssisə rəhbərləri və təhsil işçiləri iştirak ediblər.
Təhsil İdarəsinin müdiri İlhamə Abdullayeva ötən tədris ilində görülən işlər haqqında hesabat məruzəsi ilə çıxış edib, region üzrə ümumi təhsilin inkişafı ilə bağlı həyata keçirilən tədbirlər və layihələrin tətbiqi vəziyyətindən danışıb. Həmçinin o, növbəti tədris ili üçün təhsil işçilərinin qarşısında duran əsas vəzifələri qeyd edib.
Elm və Təhsil Nazirinin müavini Firudin Qurbanov isə təhsil üzrə prioritet istiqamətlər haqqında məlumat verib, təhsilin idarəedilməsində əlçatanlıq və şəffaflığın təmini üçün qarşıda duran vəzifələr barədə qeydlərini diqqətə çatdırıb.
İcra başçısı Zakir Fərəcov yeni tədris ili münasibətilə konfrans iştirakçılarına uğurlar arzulayıb.
Daha sonra Təhsil İnstitutunun direktor müavini 2023-2024-cü tədris ili ərzində rəhbərlik etdiyi qurumun həyata keçirdiyi tədbirlərdən danışıb.
Həmçinin o, şagird qiymətləndirilməsi, statistik göstəricilər, 4-6-cı sinif şagirdlərinin monitorinqindən çıxan nəticələr, olimpiada və digər müsabiqələrin nəticələri, növbəti tədris ili ərzində nəzərdə tutulan layihələr barədə ətraflı məlumat verib.
