Sumqayıt Şəhər Məhkəməsi torpaq sahəsini qanunsuz zəbt etməkdə təqsirləndirilən İsa Fətiyev barəsində bəraət hökmü çıxarıb.
Bu barədə təqsirləndirilən şəxsin vəkili Anar Qasımlı məlumat verib.
Məhkəmədə İ.Fətiyevin Cinayət Məcəlləsinin 188.2-ci maddəsi ilə təqsirləndirilməsinə dair cinayət işi araşdırılıb. İttihama əsasən, o, Sumqayıt şəhəri, Çerkassı küçəsi yaxınlığındakı 76-cı məhəllə ərazisində bələdiyyə mülkiyyətində olan 0,0276 hektar (276 kvadratmetr) torpaq sahəsini mülkiyyət, istifadə və ya icarə hüququ olmadan zəbt edərək hasarlayıb və ərazidə fərdi yaşayış evi inşa edib.
Vəkil bildirib ki, müdafiə tərəfi məhkəmədə Avropa İnsan Hüquqları Məhkəməsinin presedent hüququna və Avropa İnsan Hüquqları Konvensiyasının 1 saylı Protokolunun 1-ci maddəsinə istinad edib.
A.Qasımlının sözlərinə görə, dövlət qurumlarının uzun müddət ərzində tikintiyə müdaxilə etməməsi və şəxsin qaz, işıq və su ilə təmin olunması nəzərə alınaraq, onun "potensial mülkiyyətçi" olması əsaslandırılıb.
Məhkəmənin hökmü ilə İ.Fətiyevə bəraət verilib.
Mənbə: e-huquq.az
