Sumqayıtda azyaşlıya tibbi müdaxilədən sonra fəsad yarandığı ilə bağlı yayılan iddialara münasibət bildirilib.
Xatırladaq ki, Sumqayit24.az-a müraciət edən şəhər sakini Elşən Kərimov 2023-cü il təvəllüdlü qızının Sumqayıt şəhər Uşaq Xəstəxanasında müalicə aldığı zaman ayağına köçürülən sistemdən sonra ciddi problemlər yarandığını iddia etmişdi.
Məsələ ilə bağlı sorğumuza cavab olaraq TƏBİB-dən bildirilib ki, 15.11.2025-ci il tarixində azyaşlıya damardaxili məhlulun tətbiqi ilə bağlı səsləndirilən iddialar Sumqayıt Tibb Mərkəzinin nəzdindəki Uşaq Xəstəxanası tərəfindən tibbi sənədlər və mövcud klinik məlumatlar əsasında araşdırılıb, qiymətləndirilib:
"Bildiririk ki, 2023-cü il təvəllüdlü azyaşlı (qadın cinsli) 09.11.2025-ci il tarixində saat 16:00 radələrində Sumqayıt Tibb Mərkəzinin nəzdindəki Uşaq Xəstəxanasına hospitalizasiya olunub və dəqiqləşdirilməmiş virus infeksiyası diaqnozu ilə Yoluxucu xəstəliklər şöbəsinə yerləşdirilib.
Uşağın klinik vəziyyətinə uyğun olaraq müalicə və müşahidə tədbirləri mərhələli şəkildə aparılıb. Klinik göstərişlər və müalicə planına əsasən, azyaşlıya 15.11.2025-ci il tarixində tibbi protokollara uyğun şəkildə inyeksiya tətbiq olunub. Müalicə prosesi həkim nəzarəti altında davam etdirilib.
Uşağın ümumi vəziyyəti stabil qiymətləndirildiyindən o, 16.11.2025-ci il tarixində ambulator müalicə üçün evə buraxılıb.
Sonradan, 30.12.2025-ci il tarixində azyaşlı dəqiqləşdirilməmiş virus infeksiyası diaqnozu ilə yenidən Uşaq Xəstəxanasına hospitalizasiya olunub və stasionar müalicəyə cəlb olunub.
Müalicə zamanı valideyn tərəfindən uşağın sol ayaq pəncə nahiyəsində dəyişiklik müşahidə edildiyi bildirildikdən sonra dərhal əlavə mütəxəssis konsiliumları təşkil olunub. Aparılan müayinələr zamanı azyaşlının ümumi vəziyyəti stabil qiymətləndirilib, huşunun aydın olduğu və hərəkət funksiyasının qorunduğu müəyyən edilib. Rentgen və ultrasəs müayinələrinin nəticələrinə əsasən sümük və yumşaq toxumalarda kəskin patoloji dəyişikliklər aşkar edilməyib.
Mövcud klinik vəziyyət nəzərə alınaraq uşağa müvafiq tibbi yardım göstərilib və tibbi nəzarət təmin olunub.
Qeyd edirik ki, azyaşlının anası tərəfindən məsələ ilə bağlı hər hansı rəsmi şikayət və ya hüquqi tələb təqdim edilməyib".
