Sumqayıt şəhərində yarımçıq qalan təmir işləri ciddi narazılıq yaradıb.
Sumqayit24.az-a daxil olan məlumata görə, 10-cu mikrorayon ərazisində yağışlardan sonra yaranan problemlərin aradan qaldırılması məqsədilə bir müddət əvvəl təmir və tikinti işlərinə başlanılıb. Həyata keçirilən tədbirlər çərçivəsində ərazidə yolun bir hissəsində bərpa işləri görülüb, kanalizasiya sistemi qurulub.
Lakin sakinlərin məlumatına əsasən, işlər tam şəkildə yekunlaşdırılmayıb. Bildirilir ki, bəzi sahələrdə təmir prosesi yarımçıq saxlanılıb və işçilər ərazini tərk ediblər. Xüsusilə 10-cu mikrorayonun müəyyən hissəsində qazılmış sahələrin hələ də açıq vəziyyətdə olduğu qeyd edilir.
"Ərazidə nə bərpa işləri davam etdirilir, nə də təhlükəsizlik tədbirləri görülür. Bu vəziyyət həm piyadalar, həm də nəqliyyat vasitələri üçün çətinlik yaradır", - deyə mikrorayon sakini bildirib.
Yerli sakinlər aidiyyəti qurumlardan işlərin yekunlaşdırılmasını tələb edirlər.
