Sumqayıt Yaşıllaşdırma İdarəsinin keçirdiyi tenderin qalibi bu dəfə "Saffira Plus" olub.
Qaynarinfo.az-ın məlumatına görə, şirkət cari ildə sözügedən idarənin artıq 5-ci müsabiqəsinin qalibi seçilir. Bu tenderlərin hamısı yaşıllıqların satın alınması ilə bağlı keçirilib.
İdarənin keçirdiyi tenderlərdən 3-ü avqust, 1-i noyabr, sonuncu isə dekabr ayına təsadüf edir. Sonuncu müsabiqə üzrə satınalma müqaviləsinin maliyyə dəyəri 290.870 manatdır.
"Saffira Plus" müəmmalı şirkət kimi tanınır. Dövlət Vergi Xidmətinin reyestr məlumatlarına görə, şirkət 26 yanvar 2023-cü ildə qeydiyyata alınıb. Elə həmin ildən də dövlət satınalmalarında iştirak etməyə başlayıb və nə sirdirsə yalnız Sumqayıt Şəhər MKTİB-nin Yaşıllaşdırma İdarəsinin keçirdiyi satınalma müsabiqələrinin qalibi seçilib.
10 manatlıq nizamnamə kapitalı ilə yaradılan şirkətin hüquqi ünvanı Saatlı rayonu, Əlisoltanlı kəndi, ev 1, mənzil 23-də yeləşir. "Saffira Plus"un qanuni təmsilçisi isə Zeynalova Nurlanə Şahin qızıdır.
Açıq mənbələrdə onun haqqında heç bir məlumat yoxdur. Heç "Saffira Plus" barəsində də hər hansı məlumata rast gəlinmir.
Sumqayıt MKTİB-nin Yaşıllaşdırma İdarəsinin rəisi İlyas Həsənovdur. O, Qaçqınlar və Məcburi Köçkünlərin İşləri üzrə Dövlət Komitəsinin keçmiş sədri, baş nazirin sabiq müavini Əli Həsənovun qardaşıdır.
