Bu gün Qubadlı rayonunun bir neçə kəndinin və Qubadlı şəhərinin erməni işğalından azad olunması günüdür.
Heç kimə sirr deyil ki, Birinci Qarabağ müharibəsi zamanı doğma yurdundan didərgin düşən qubadlılıların əksəriyyəti, yəni 6 minə yaxın ailə Sumqayıta sığınıb, burada məskunlaşıb.
Sumqayit24.az xəbər verir ki, Qubadlı rayonunun idarə, müəssisə, təşkilatlarının çoxu, habelə Qubadlı Rayon İcra Hakimiyyətinin yeni tikilmiş inzibati binası da məhz Sumqayıt şəhərində yerləşir.
12-ci mikrorayonda məcburi köçkünlər üçün inşa edilmiş şəhərcikdə rayondan olan 521 ailə yaşayıb. Həmin şəhərcikdə iki məktəb, Qubadlı şəhər 2 saylı körpələr evi-uşaq bağçası yerləşir.
Həmçinin 26-cı məhəllədə yerləşən “Şəfa” sanatoriyası ərazisində 800 nəfərlik mərasim evi, 12-ci mikrorayon ərazisində 100 nəfərlik, 47-ci məhəllədə 150 nəfərlik mərasim evləri tikilib, zəruri avadanlıqlarla təmin edilərək məcburi köçkünlərin istifadəsinə verilib.
Eyni zamanda, “Şəfa” sanatoriyasının 1 və 2-ci mərtəbəsində olan 74 boş otaq və 1500-dən çox fərdi ev rayon icra hakimiyyətinin köməyi ilə məcburi köçkünlər üçün təmir olunub.
Sumqayıtda TİKA (Türkiyə İşbirliyi Koordinasiya Agentliyi) və Qubadlı Arıçılar Birliyi birgə 119 min manat vəsait qoyularaq 34 min manat yerli, 85 min manat xarici investisiya hesabına arıçılıq məhsullarının qablaşdırılması üçün rayon arıçılarına xidmət göstərən müəssisə yaradılıb.
Bundan əlavə, “Şəfa” sanatoriyasında müasir idman avadanlıqları ilə təmin olunmuş zalda idmançıların məşq keçməsi və fiziki cəhətdən yarışlara hazırlanması üçün bütün şərait yaradılıb.
Qeyd edək ki, Sumqayıtda əslən Qubadlıdan olan şəhid, elm adamı, sənətkar və idmançıların da sayı az deyil. Məsələn, Azərbaycanın Milli Qəhrəmanı, şəhid polkovnik Şükür Həmidov da ailəsi ilə məhz Sumqayıtda məskunlaşıb. Yunan-Roma güləşi üzrə dəfələrlə dünya və Avropa çempionu, “Bakı-2017” İslam həmrəyliyi oyunlarının qalibi olmuş İslam Abbasov da Sumqayıtda böyüyüb boya-başa çatan Qubadlı idmançılarındandır. Həmçinin Azərbaycan Yazıçılar Birliyi Qubadlı Regional Bölməsinin sədri, qubadlılı şair Namiq Məna da Sumqayıtda yaşayır.
