Sumqayıt şəhərində istismar müddətini başa vuran qəzalı binalar söküləcək.
İşlər 4-cü, 15-ci, 16-cı, 17-ci və 21-ci məhəllələrdə aparılacaq. Bu barədə Oxu.Az-a Azərbaycan Qiymətləndiricilər Cəmiyyətinin sədri Vüqar Oruc məlumat verib.
Onun sözlərinə görə, ilkin mərhələdə 13 qəzalı binada söküntü aparılacaq. Sözügedən binalar əsasən 1945–1955-ci illərdə inşa olunub və bir-iki mərtəbəlidir. Bu proses nəticəsində 1000-dən çox ailənin köçürüləcəyi gözlənilir. Söküləcək tikililər arasında "fin evi" kimi tanınan binalar da var.
Vüqar Oruc bildirib ki, söküntünün əsas məqsədi həmin binalarda yaşayan sakinlərin təhlükəsizliyinin təmin olunması və onların yeni mənzillərlə təmin edilməsidir.
Kompensasiya məsələsinə də toxunan sədr qeyd edib ki, bir kvadratmetr üçün ödənişin 2000–2500 manat civarında olması məqsədəuyğundur. Hazırda tətbiq olunan təxminən 1500 manatlıq qiymət isə yeni mənzil almaq üçün kifayət etmir.
O əlavə edib ki, kompensasiya alan sakinlərin yalnız Sumqayıt şəhəri ərazisində mənzil əldə etməsi məqsədəuyğundur. Bu, şəhərin inkişafı və əhalinin Sumqayıtda qalması baxımından vacibdir.
Hazırda Sumqayıtda 21 binanın və 450-dən çox mənzilin söküləcəyi ilə bağlı məlumat var. Gələcək mərhələlərdə bu rəqəmin 40 binaya və 1500 mənzilə çatacağı gözlənilir.
Xatırladaq ki, Sumqayıtda yeni urbanizasiya layihəsinin icrası planlaşdırılır. Layihə çərçivəsində Çin investorlarının iştirakı ilə köhnə "fin evləri"nin yerində yeni yaşayış şəhərciyinin salınacağı bildirilir. Yeni layihədə çoxmərtəbəli binalar, ticarət mərkəzləri, istirahət zonaları, məktəb və uşaq bağçalarının inşası nəzərdə tutulur.
