Sumqayıt şəhərinin deputatı Elnarə Akimova Şimali Kipr Türk Cümhuriyyətində beynəlxalq tədbirlərə qatılıb.
Sumqayit24.az xəbər verir ki, o, Lefkoşada keçirilən "Türk Dünyası Uşaq Ədəbiyyatı Seminarı"nın açılışında və oturum müzakirələrində iştirak edir.
Məqsədi türk dünyasında uşaq ədəbiyyatının mövcud vəziyyətini qiymətləndirmək, keyfiyyətli ədəbi nümunələrin yaranmasını təşviq etmək, ortaq ədəbi düşüncə formalaşdırmaq və bu sahədə beynəlxalq əməkdaşlığı genişləndirmək olan seminarda çıxış edən E.Akimova bildirib ki, Türk dünyasında ortaq mədəni yaddaşın qorunmasında uşaq ədəbiyyatı mühüm rol oynayır:
"Uşaq ədəbiyyatı yalnız estetik zövq formalaşdırmır, eyni zamanda milli kimliyin, dilin, mənəvi dəyərlərin və ortaq tarixi yaddaşın gələcək nəsillərə ötürülməsində strateji əhəmiyyət daşıyır. Türk xalqları arasında ortaq ədəbi platformaların yaradılması bu baxımdan xüsusi önəm kəsb edir".
Qeyd edək ki, seminarda Türkiyə, Şimali Kipr Türk Cümhuriyyəti, Azərbaycan, Qazaxıstan, Qırğızıstan, Özbəkistan, eləcə də Şimali Makedoniya və Kosovodan alimlər, yazıçılar və nəşriyyat nümayəndələri iştirak ediblər.
