Bu gün Sumqayıtın iki igid oğlunun – Vüqar Məmmədovun və Aydın Əliyevin doğum günüdür.
Vüqar Məmmədov 9 yanvar 1994-cü ildə Sumqayıtda anadan olub. Bakı Dövlət Universitetində təhsil alıb, hərbi xidmətdə topçu və manqa komandiri kimi xidmət edib. 2016-cı ilin aprel döyüşlərinin iştirakçısı olub. 44 günlük Vətən müharibəsi başlayanda könüllü olaraq cəbhəyə yollanıb. 9 oktyabr 2020-ci ildə Füzuli şəhərinin azadlığı uğrunda gedən ağır döyüşlərdə şəhid olub. Ölümündən sonra "Vətən uğrunda" və "Füzulinin azad olunmasına görə" medalları ilə təltif edilib.
Onunla eyni gündə doğulan digər qəhrəman isə Aydın Əliyevdir. 9 yanvar 1991-ci ildə Sumqayıtda anadan olub. Mülki həyatda çalışsa da, Vətən müharibəsi başlayanda könüllü olaraq döyüşlərə qatılıb. Cəbrayıl, Xocavənd, Füzuli və Şuşa istiqamətlərində vuruşub. 7 noyabr 2020-ci ildə Füzuli istiqamətində ağır yaralanıb, 28 noyabrda şəhidlik zirvəsinə ucalıb. Prezident tərəfindən "Vətən uğrunda", "İgidliyə görə", "Cəbrayılın azad olunmasına görə", "Xocavəndin azad olunmasına görə", "Füzulinin azad olunmasına görə" və "Şuşanın azad olunmasına görə" medallarına layiq görülüb.
Doğum günlərində onları ehtiramla anırıq. Ruhları şad olsun!
