Sumqayıtın sosial-iqtisadi göstəriciləri açıqlanıb.
Sumqayit24.az xəbər verir ki, bu barədə Sumqayıt şəhər İcra Hakimiyyətinin Mətbuat Xidmətinin rəhbəri Eyvaz Qocayev məlumat verib. Onun sözlərinə görə, 2024-cü ilin ilk doqquz ayında Sumqayıt şəhərində iqtisadiyyatın müxtəlif sahələrində nəzərəçarpacaq inkişaf müşahidə olunub:
“Bu dövr ərzində ümumi məhsul və xidmətlərin həcmi 3 milyard 547 milyon 371,8 min manata çatıb ki, bu da 2023-cü ilin eyni dövrü ilə müqayisədə 6,8% artım deməkdir. İqtisadiyyatda istehsal sektorunun ümumi məhsul buraxılışında xüsusi çəkisi 84,8%, xidmət sektorunun payı isə 15,2% təşkil edib".
İcra Hakimiyyətinin sözçüsü qeyd edib ki, sənaye sahəsindəki göstəricilərdə də artım müşahidə olunur. Faktiki qiymətlərlə sənaye məhsulu və xidmətlərin ümumi dəyəri 2 milyard 849 milyon 209 min manat olub və sabit qiymətlərlə 106,8% səviyyəsində artım qeydə alınıb. Bu nəticələr Sumqayıtın sənaye potensialının gücləndiyini və iqtisadiyyatında yeni dəyərlərin yarandığını göstərir. Şəhərin iqtisadi və sosial sahələrinin inkişafı üçün əsas kapitala qoyulan vəsait də artıb. 2024-cü ilin yanvar-sentyabr ayları ərzində Sumqayıt şəhərində müxtəlif maliyyə mənbələrindən 178 milyon 168,3 min manat vəsait yönəldilib ki, bu da əvvəlki ilin eyni dövrü ilə müqayisədə 4,3% çoxdur.
Əsas kapitala yönəldilmiş vəsaitlərin 142,4 milyon manatı, yəni 79,9%-i birbaşa tikinti-quraşdırma işlərinə sərf olunmuşdur. Bu vəsaitin 53,5%-i dövlət sektoruna, 46,5%-i isə qeyri-dövlət sektoruna aid olub.
