Sumqayıtda növbəti dəfə reyd keçirilib.
Dünya TV-nin məlumatına görə, məqsəd qida təhlükəsizliyi və ticarət qaydalarına əməl edilməsinə nəzarət olub. İcra Hakimiyyəti, Bələdiyyə, Memarlıq və Tikinti İdarəsi, eləcə də Azərbaycan Qida Təhlükəsizliyi Agentliyinin Sumqayıt bölməsinin əməkdaşlarının birgə təşkil etdiyi tədbir çərçivəsində müxtəlif ərazilərdə kütləvi icarə fəaliyyəti ilə məşğul olan obyektlərdə monitorinqlər aparılıb.
Sanitar norma və qaydalara uyğunluq, həmçinin fəaliyyət sahələrinin texniki tələblərə nə dərəcədə cavab verdiyi yoxlanılıb.
Bundan əlavə ət dükanlarında da reyd keçirilib. AQTA-nın mütəxəssisləri tərəfindən ətin saxlanma şəraiti, kəsim tarixləri, satış üçün təqdim olunan məhsulların keyfiyyət göstəriciləri və uyğun sertifikatların olub-olmaması araşdırılıb. Sanitar qaydalara riayət olunmayan, məhsulun mənşəyi və təhlükəsizliyi ilə bağlı uyğunsuzluq aşkarlanan hallarla bağlı sahibkarlara xəbərdarlıq edilib.
Müəyyən hallarda isə pozuntuların aradan qaldırılması üçün göstərişlər verilib.
