“Yaddaş sarayları” sənədli filminin çəkilişləri yekunlaşıb.
Sumqayit24.az xəbər verir ki, Sumqayıt şəhərində çəkilişləri aparılan ekran əsərinin rejissoru Mətləb Muxtarov, prodüseri Emil Nəcəfovdur.
Filmin xronometrajı 27 dəqiqədir. “Yaddaş sarayları” filmi rejissorun ilk xatirəsinin axtarışından bəhs edir. Uşaqlığının ən maraqlı dövrünə qayıtmaq istəyən rejissor, o illərin izlərini tapmaq üçün doğulub-böyüdüyü şəhərin küçələrini gəzir. Bu gəzintilər onu ilk xatirəsinin olduğu yerə gətirir. Bu xatirə körpəlikdə itirdiyi atası və vəfat etmiş nənəsi ilə bağlıdır. Xatırladığı hadisə onun bir yaşı olanda baş verib. Rejissor bundan sonra ilk xatirəsinin həqiqətən baş verib-vermədiyini anasından öyrənməyə çalışır, amma anası onu əmin edir ki, həmin hadisəni xatırlaması mümkün deyil. Eşitdiyi cavabdan məyus olan rejissor başqa “ilk xatirə”lərinin axtarışına çıxır və axtarışlar onu 90-cı illərdə xalqının yaşadığı travmalara aparıb çıxarır.
Sənədli film Azərbaycan Respublikasının Kino Agentliyinin (ARKA) həyata keçirdiyi postprodakşn mərhələsində olan film layihələrinə dəstək müsabiqəsinin qaliblərindən biridir.
