Xəbər verdiyimiz kimi, sumqayıtlı xanım dünya reytinqində ikinci olan universitetdə magistratura pilləsinə qəbul olub.
Belə ki, Röya Qasımova dünya reytinqinin ikincisi olan "Imperial College London" universitetinin Maliyyə və mühasibat ixtisası üzrə magistratura pilləsinə qəbul olub.
R.Qasımova 2021-ci ildə 683.2 bal toplayaraq II qrup üzrə ölkə ikincisi olub və Prezident təqaüdünə layiq görülüb. Bunadan əlavə o, müxtəlif beynəlxalq yarışlarda iştirak edərək uğur qazanıb.
Qeyd edək ki, Röya Qasımova Sumqayıt şəhər Təbiət Elmləri Təmayüllü Gimnaziyada təhsil alıb.
Sumqayit24.az-ın əməkdaşı Röya xanımla həmsöhbət olub. Yerlimiz öz uğurlarından, bu uğurların sirlərindən və gələcək məqsədlərindən danışıb. O, həmçinin indiki gənclərə bir sıra tövsiyələr də verib.
Müsahibəni təqdim edirik.
- Özünüzü təqdim edin, zəhmət olmasa.
Mən Qasımova Röya - Bakı Ali Neft Məktəbinin Biznesin İdarə Edilməsi ixtisası üzrə 5-ci kurs tələbəsiyəm.
- Ardıcıl uğurlarınızın arxasında nələr dayanır?
Məncə, əsas səbəb təhsil təməlimin möhkəm olmasıdır. Məktəb illərindən etibarən dərslərim hər zaman prioritetim olub. Bundan əlavə, qarşıma qoyduğum məqsədlər mənə motivasiya verir ki, çalışaraq uğur qazanım.
- Uğura gedən yolda qarşılaşdığınız ən böyük çətinlik nə olub və bu çətinliyi necə dəf etmisiniz?
Açığı, çox böyük çətinliyim olmayıb. Bəzən iş, dərs yüküm ağır olur və vaxtı idarə etmək mənim üçün çox çətin olur. Belə hallarda isə yeganə çıxış yolum daha çox çalışmaqdır.
- Yorulduğunuz və motivasiyanızın azaldığı anlarda özünüzü necə toparlayırsınız?
Bu zaman qarşılaşdığım çətinlikləri böyütməməyə çalışıram və bunun hər kəsin həyatında ola biləcəyinə özümü inandırıram. Qısa müddətdə yaşanan çətinliklərin uzunmüddətli uğura gətirəcəyini düşünmək mənə motivasiya verir.
- Hazırda həm işləyib, həm də təhsil alırsınız. Bir çox insanın daim dediyi "vaxt çatdıra bilməmək" məsələsini siz necə həll edirsiniz? Gününüzü necə planlaşdırır və bu balansı necə qoruyursunuz?
Vaxt çatdırmaq bəzən çətin olur, xüsusilə imtahan dövrlərində. Amma effektiv işləmək, əvvəlcədən plan qurmaq və həm iş, həm də universitetlə daim əlaqədə olmaq mənə bu balansı qorumağa kömək edir.
- Əgər yenidən karyeranıza sıfırdan başlamaq imkanınız olsaydı, nəyi fərqli edərdiniz?
Xeyr, heç nəyi dəyişmək istəməzdim.
- Sizin kimi uğur qazanmaq istəyən gənclərə ən vacib tövsiyəniz nədir?
Gənclərə ən böyük tövsiyəm odur ki, hər zaman təhsilə önəm versinlər və öz üzərlərində işləməyi dayandırmasınlar. Yaşadığımız dövrdə hər gün müxtəlif yeniliklərə şahid oluruq. Bunlara uyğunlaşmaq və uğurlu karyera qurmaq üçün savadlı olmaq mütləqdir. Xüsusilə vurğulamaq istərdim ki, ingilis dilini öyrənmək artıq dövrümüzün tələbidir və hər bir gəncin ikinci dil kimi bilməsi vacibdir.
- Bundan sonrakı hədəfləriniz nələrdir? Gələcəkdə özünüzü harada görürsünüz?
Bundan sonrakı hədəfim təhsilimi xaricdə davam etdirmək, daha sonra isə ölkəyə qayıdaraq nüfuzlu şirkətlərdə maliyyə sahəsində karyera qurmaqdır.
