Turkiyədə sumqayıtlı şəhid jurnalist Sirac Abışovun adına xüsusi mükafat təsis olunub. Bu haqda Report xəbər yayıb.
Sözügedən mükafata müxbir Anar Şuşalı, operatorlar İlkin Mehdiyev və Daşqın Abdullayev layiq görülüblər. Mükafatlar Ankarada, Türkiyə Xəbər Video-operatorları Cəmiyyətinin təşkil etdiyi “Zoom” (Zum) 25-ci beynəlxalq xəbər videosu müsabiqəsinin qaliblərinin mükafatlandırılması mərasimində təqdim edilib.
Məlumata əsasən, müsabiqəyə Türkiyə ilə yanaşı, Azərbaycan, Gürcüstan, Braziliya da daxil olmaqla digər xarici ölkələrdən, qaynar nöqtələrdə baş verən hadisələri əks etdirən ümumilikdə 105 video göndərilib. Bu videoların arasında şəhid jurnalistimizin müharibə zamanı çəkilmiş kadrları da nümayiş olunub.
Qeyd edək ki, Türkiyədə digər azərbaycanlı şəhid jurnalist Məhərrəm İbrahimovun da adına mükafat təsis edilib.
Adları çəkilən jurnalistlərimiz 4 iyun tarixində Kəlbəcər rayonunun Susuzluq kəndinə gedən yolda minaya düşərək şəhid olublar.
Foto Report.az
