Sumqayıtda doqquz mərtəbəli yaşayış binasının lifti qəzalı vəziyyətdədir.
Sakinlərin “Sumqayıt24”-ə verdiyi məlumata görə, söhbət 9-cu mikrorayonda yerləşən 25-ci binadan gedir. Liftin iç hissəsi köhnəlib, döşəməsi və divarlarında bəzi yerlər, eləcə də düymə paneli korroziyaya uğrayıb. Eyni zamanda liftə minəndə ətrafı pis qoxu bürüyür.
“2011-ci ildən bu binaya köçmüşük. O vaxtdan lift təmir olunmur. 7-8 il əvvəl köməkçi tros qırılıb. Bu lift təhlükə mənbəyidir. Dəfələrlə mərtəbələrdə lift ilişib qalıb. MKİS əməkdaşının köməyi ilə liftdən çıxmışıq, bu da vaxt aparır. Hər ay bizdən 1.40 manat lift pulu yığırlar. Liftin qapısını boz rəngə boyayıblar, guya ki, təmir olunub. Dəfələrlə müraciət etsək də, şikayətimizə baxan yoxdur”, - deyə şikayətçilər əlavə ediblər.
