Tatarıstan Respublikasının Baş nazirinin müavini, sənaye və ticarət naziri Oleq Korobçenko Sumqayıtda olub. Bu haqda 30 noyabr tarixində Sumqayıt24 xəbər verir.
Səfər zamanı onu 40-a yaxın şirkətin rəhbər şəxslərindən ibarət nümayəndə heyəti müşayiət edib. Sumqayıt Kimya Sənaye parkında onlar İqtisadi Zonaların İnkişafı Agentliyinin İdarə Heyətinin sədri Elşad Nuriyevlə görüşüblər.
Elşad Nuriyev ölkədə fəaliyyət göstərən sənaye zonaları və aqroparklar, sahibkarlar üçün yaradılan imkan və güzəştlər barədə məlumat verib. Sonra sənaye zonaları və aqroparkların təqdimatı keçirilib.
Görüşdə Tatarıstanda yerləşən “Alabuqa” Xüsusi İqtisadi Zonası və Ximqrad Texnopolis ilə əməkdaşlıq əlaqələrinin qurulması müzakirə edilib, tatarıstanlı iş adamları sənaye zonalarında yaradılmış imkanlardan yararlanmağa dəvət ediliblər.
Sonda qonaqlar İZİA-nın Peşə Təhsil Mərkəzinin fəaliyyəti, həmçinin SOCAR-STP-nin Ağır maşınqayırma və Dəqiq mexaniki emal zavodlarında gedən istehsal prosesi ilə tanış olublar.
