Sumqayıt şəhəri, 10-cu mikrorayon ərazisində, 65 nömrəli binanın arxasında yerləşən səki uzun müddətdir ki, bərbad vəziyyətdədir.
Sumqayit24.az-a müraciət edən sakinlərin sözlərinə görə, piyada yolunun altından keçən su borusu tez-tez partlayır:
"Sumqayıt Sukanal İdarəsinin əməkdaşları əraziyə gələrək borunu müvəqqəti şəkildə, "taxta" vasitəsilə təmir edir və ərazini əvvəlki vəziyyətinə qaytarmadan gedirlər. Cəmi 2-3 gün sonra isə eyni problem təkrarlanır – boru yenidən partlayır, su axır, səki yenidən qazılır.
Bu vəziyyət həm içməli suyun israf olunmasına səbəb olur, həm də piyadaların hərəkətini çətinləşdirir. Xüsusilə yaşlılar, uşaqlar və əlil arabası ilə hərəkət edən şəxslər üçün ərazi demək olar keçilməz haldadır. Yağışlı havalarda isə vəziyyət daha da ağırlaşır, səki palçığa çevrilir".
Sakinlər aidiyyəti qurumları problemi köklü şəkildə həll etməyə çağırırlar. Müvəqqəti və qeyri-peşəkar təmir işləri əvəzinə, ərazidə boru xəttinin tam şəkildə yenilənməsi və səkilərin əsaslı bərpası tələb olunur.
