"Bu gün bələdiyyənin əsas vəzifələrindən biri sabit, dayanıqlı maliyyə mənbəyinin yaradılması olmalıdır. Lakin bu vəzifənin icrası maliyyə vəsaiti tələb etdiyindən bütün hallarda bələdiyyənin vergi xidməti var gücü ilə çalışmalı, büdcə daxilolmalarını artırmaq üçün bütün vasitələrdən istifadə etməlidir"- bu fikirləri Sumqayit24.az-a Sumqayıt bələdiyyəsinin sədri Adil Xudadatov deyib.
Onun sözlərinə görə, Sumqayıt Şəhər İcra Hakimiyyətinin başçısının dəstəyi, Sumqayıt bələdiyyəsinin təşkilatçılığı ilə inşa edilən və bələdiyyənin nəzdində yaradılan "Muğam və Yaradıcılıq mərkəzi"nin binasına bu günlərdə hüquqların dövlət qeydiyyatı daşınmaz əmlakın dövlət reyestrindən çıxarış alınıb:
"2716 kv.metr sahəsi olan Muğam və Yaradıcılıq Mərkəzində keçirilən tədbirlər sayəsində bu gün bələdiyyə büdcəsinə sabit maliyyə vəsaiti daxil olur. Artıq ilkin maliyyə vəsaiti bu istiqamətdən bələdiyyə büdcəsinə daxil olmaqdadır.
Bələdiyyənin vergi xidməti bütün qüvvələrini səfərbər edərək büdcə gəlirlərini artırmaqla əlavə dayanıqlı maliyyə mənbəyini yaratmağa çalışır.
Məhz bu fəaliyyətin nəticəsidir ki, birinci rüb ərzində vergilərin yığımında 21 faizlik artım müşahidə olunub".
