II ixtisas qrupu üzrə ölkə miqyasında ən yüksək nəticə göstərən Zamin Kərimovun qəbul olduğu ali təhsil müəssisəsi bəlli olub.
Sumqayit24.az-a daxil olan məlumata görə, Sumqayıt şəhər 35 nömrəli tam orta məktəbin məzunu Zamin Kərimov Bakı Ali Neft Məktəbinin Maliyyə ixtisasına (tədris ingilis dilində) qəbul olub.
Zamin Kərimov qısa olaraq təəssüratlarını Sumqayit24.az-la bölüşüb.
"Çox sevincliyəm. Onsuz da gözləyirdim, amma xəbəri almaq yenə də həm ailəmi, həm də məni çox sevindirdi", – deyə o, bildirib.
Qeyd edək ki, Zamin Kərimov 690 bal toplayaraq II ixtisas qrupu üzrə ölkədə ən yüksək nəticəni göstərib.
***
Həmçinin qəbul imtahanında maksimum nəticə göstərən İnci Mursaquliyevanın da qəbul olduğu universitet bəlli olub.
Məlumata görə, Təbiət Elmləri Təmayüllü Gimnaziyanın məzunu İnci Mursaquliyeva Azərbaycan Tibb Universitetinin (ATU) Müalicə işi ixtisasına (Müalicə-profilaktika fakültəsi, tədris Azərbaycan dilində) qəbul olub.
İnci Mursaquliyeva da təəssüratlarını bizimlə bölüşüb.
"İstədiyim fakültəyə düşmüşəm. Nəticə gözlədiyim kimi oldu, sadəcə təsdiqləndiyi üçün çox sevindim", – deyə o, sevincini bölüşüb.
Qeyd edək ki, o, buraxılış imtahanında 290.2 bal, qəbul imtahanından isə maksimum nəticə- 400 bal toplayaraq ümumilikdə 690.2 bal əldə edib.
