Saray qəsəbəsində yerləşən "Saray-H" MTK yaşayış massivində yolun vəziyyəti ürəkaçan deyil.
Sumqayit24.az-a müraciət edən şikayətçinin sözlərinə görə, ərazidə onlarla bina və minlərlə sakin yaşayır. Yaşayış kompleksi genişlənərək yeni binaların tikintisi davam etsə də, daxili yollara diqqət göstərilmir.
Sakin xüsusilə 20-ci binadan Heydər Əliyev küçəsinə, 508 nömrəli avtobusun son dayanacağı istiqamətində uzanan yolun vəziyyətindən şikayətlənib. Onun sözlərinə görə, yolun böyük hissəsi qum-torpaq və palçıq içindədir:
"Burada evlərin qiyməti günü-gündən artır, amma bir dənə yolu asfaltlaya bilmirlər?!"
Sakin aidiyyəti qurumlardan və yaşayış kompleksinin rəhbərliyindən ərazidə yolun asfaltlanmasını və problemin aradan qaldırılmasını tələb edir.
