Sumqayıt Şəhər Uşaq Xəstəxanasında mövcud vəziyyətlə bağlı şikayət var.
Bu barədə Sumqayit24.az-a sakinlər məlumat veriblər.
Şikayətçilərin sözlərinə görə, xəstəxananın təcili yardım şöbəsində həkim çatışmazlığı yaşanır. Bildirilib ki, uşağın yıxılması nəticəsində qol və ayaqlarında ağrı yarandığı üçün xəstəxanaya müraciət edilib. Lakin həkim çatışmazlığı səbəbindən uşaq müayinə olunmaq üçün bir neçə saat gözləməli olub.
Vətəndaşın iddiasına görə, şöbədə yalnız bir həkim çalışır və onun 65 yaşı var.
Həmçinin iddia olunub ki, həmin həkimin bir neçə xəstəxanaya xidmət göstərməsi də uşağın müayinə edilməsində gecikməyə səbəb olub.
Məsələ ilə bağlı Sumqayit24.az-a TƏBİB-dən açıqlama verilib.
"Sumqayıt Tibb Mərkəzinin nəzdində fəaliyyət göstərən Uşaq Xəstəxanasında uşaq travmatoloquna ehtiyac mövcuddur. Bu ixtisas üzrə həkimin işə cəlb olunması və xidmətin daha operativ təşkili istiqamətində müvafiq tədbirlər görülür.
Təcili tibbi yardım şöbəsinə müraciət edən pasiyentlər ilkin olaraq növbətçi həkim tərəfindən müayinə olunur, zərurət yarandıqda isə travmatoloqun konsultasiyası təmin edilir", - deyə məlumatda qeyd olunub.
