Sumqayıtda valideyn himayəsindən məhrum gənclərə karyera qurmaq üçün imkan yaradılacaq. Sumqayıt24 bu haqda Apa.az-a istinadən xəbər verir.
“Azercell Telekom” MMC “SOS Uşaq Kəndləri - Azərbaycan” Assosiasiyası ilə tərəfdaşlıq edir. Qurulan layihənin məqsədi “SOS Uşaq Kəndləri”ndə və icmalarda böyüyən 15-25 yaş aralığında 100 gənci iş bazarına hazırlamaq və şəxsi inkişafları üçün yeni təşəbbüslər yaratmaqdır.
Sumqayıt, Bakı və Gəncə şəhərlərini əhatə edəcək fəaliyyətlər ilk növbədə 8 modullu məşğulluğa hazırlıq və kiçik sahibkarlıq mövzularında onlayn təlimlərdən ibarət olacaq. Liderlik bacarıqları, kommunikasiya bacarıqları təlimləri, maliyyə savadlılığı kimi praktiki modullar, insan qaynaqları menecerləri ilə müsahibələrin keçirilməsi planlaşdırılıb. Qeyd edək ki, vebinarlar “YouthLinks” platforması üzərindən təqdim olunacaq.
Növbəti mərhələdə gənclərin bilik, bacarıq və istəklərinə uyğun peşə təlimlərinə cəlb edilməsi nəzərdə tutulub. Hazırlığı uğurla bitirmiş gənclər müxtəlif biznes nümayəndələrinin yanında təcrübə və mentorluq proqramı keçəcəklər.
