Vətən müharibəsinin 23-cü günündə Azərbaycan ordusu düşməni əzəli torpaqlarımızdan qovmağa davam edib. Hərbçilərimiz misli görünməyən döyüş əməliyyatlarını xüsusi dəqiqliklə aparıb.
Bunun nəticəsində cəbhənin müxtəlif istiqamətlərində Ermənistan silahlı qüvvələrinin canlı heyəti, 2 ədəd T-72 tankı, 2 ədəd BM-21 “Qrad” YARS, 1 ədəd D-30 və 1 ədəd D-20 haubitsa topları və 11 ədəd avtomobil texnikası məhv edilib.
Sumqayit24.az 18 oktyabr 2020-ci ildə baş verənlərin xronikasını təqdim edir:
Düşmənin xain təxribatları davam etməkdə idi. Ermənistan silahlı qüvvələri Goranboy, Tərtər və Ağdam rayonlarının ərazisini minaatanlar və toplardan atəşə tutub. Düşmən qüvvələrinin humanitar atəşkəs rejimini kobud şəkildə pozaraq Tərtəri atəşə tutmağa davam etməsi nəticəsində 1 nəfər ağır yaralanıb. Saat 11:10-dan başlayaraq isə Berd rayonu istiqamətindən Tovuz rayonunu, Vardenis rayonu istiqamətindən isə Daşkəsən rayonu ərazisindəki Ordumuzun döyüş mövqelərini iriçaplı silahlardan atəşə tutulub.
Həmçinin Ermənistan silahlı qüvvələri hərbi əməliyyatlar aparılan ərazidən təxminən 300 kilometrdən artıq məsafədə yerləşən Xızı rayonuna raket zərbələri endirməyə cəhd göstərib. Lakin Ordumuzun hərbi hava hücumundan müdafiə qüvvələri bunun qarşısını alıb.
Saat 15:00-da düşmənin Ağdam rayonunu müxtəlif istiqamətlərdən intensiv raket və ağır artilleriyadan atəşə tutması nəticəsində Bənövşələr qəsəbəsində 2 nəfər xəsarət alıb.
Eyni zamanda AZTV-nin əməkdaşları raket hücumuna məruz qalıblar. 1 nəfər isə xəsarət alıb.
Saat 17:00-da Ermənistan silahlı qüvvələri Tərtər və Ağdam rayonlarının yaşayış məntəqələrini yenidən artilleriya atəşinə tutub.
Prezident İlham Əliyev özünün “X” səhifəsində (keçmiş "Twitter") Cəbrayıl rayonunun Soltanlı, Əmirvarlı, Maşanlı, Hasanlı, Alıkeyxalı, Qumlaq, Hacılı, Göyərçin Veysəlli, Niyazqulular, Keçəl Məmmədli, Şahvəlli, Hacı İsmayıllı, İsaqlı kəndlərinin işğaldan tam azad edildiyini açıqlayıb.
