Ermənistanın törətdiyi təxribata cavab olaraq başlanan Vətən müharibəsi Azərbaycanın tarixinə qızıl hərflərlə həkk olunub. Qəhrəman əsgərimiz cəmi 44 gün ərzində düşmən qüvvələrini çökdürüb, onlara təslim olaraq, Azərbaycanın əzəli torpaqlarını ardına baxmadan, qaçaraq tərk etməkdən başqa çıxış yolu qoymayıb.
Sumqayit24.az 1 noyabr 2020-cü ildə, yəni haqq savaşımızın 36-cı günündə cərəyan edən hadisələri xatırladır:
- Döyüş əməliyyatları əsasən cəbhənin Ağdərə, Ağdam, Xocavənd və Qubadlı istiqamətlərində davam edib. İşğalçı ordunun xeyli sayda canlı qüvvəsi, bir ədəd piyada döyüş maşını, iki ədəd BM-21 “Qrad” yaylım atəşli reaktiv sistemi, səkkiz ədəd müxtəlif tipli topu, iki rabitə qülləsi, beş ədəd avtomobil texnikası sıradan çıxarılıb.
- Prezident İlham Əliyev Türkiyənin xarici işlər naziri Mövlud Çavuşoğlunun başçılıq etdiyi nümayəndə heyətini qəbul edib.
- Ermənistan silahlı qüvvələrinin döyüş sursatı yüklənmiş hərbi yük maşınları partladılıb.
- Zəngilan istiqamətində düşməndən növbəti hərbi qənimət götürülüb.
- Tərtər rayonunun yaşayış məntəqələri növbəti dəfə artilleriya atəşinə tutulub.
- Düşmənə məxsus iki ədəd “Qrad”, iki artilleriya batareyası, hərbi avtomobil korteji sıradan çıxarılıb.
- Müdafiə Nazirliyi Ermənistan silahlı qüvvələrinin canlı qüvvəsinin məhv edilməsinin videogörüntüsünü paylaşıb.
- Düşmənin xeyli sayda canlı qüvvəsi aviazərbələrlə məhv edilib.
