44 günlük müharibənin 7-ci günü, yəni 3 oktyabr 2020-ci il tarixdə Azərbaycan Prezidenti İlham Əliyev xalqa bir neçə kəndin işğaldan azad edildiyini bəyan edib.
Sumqayit24.az xəbər verir ki, Prezident öz “X” (əvvəllər “Twitter”) platformasındakı paylaşımında Cəbrayıl rayonunun Mehdili, Çaxırlı, Aşağı Maralyan, Şəybəy və Quycaq kəndlərinin, Füzuli rayonunun isə Aşağı Əbdürrəhmanlı kəndinin Azərbaycan Ordusu tərəfindən azad edildiyini bildirib.
Prezident İlham Əliyev Tərtər rayonunun işğaldan azad olunan Madagiz kəndinin tarixi adını bərpa edərək onun Suqovuşan adlandırıldığını elan edib.
Müdafiə Nazirliyi müharibənin ilk həftəsi ərzində düşmənin ümumi itkilərinin sayını açıqlayıb: 230-dək tank və digər zirehli texnika, 250 ədəd artilleriya, yaylım atəşli raket sistemləri, minaatan, 38 ədəd hava hücumundan müdafiə vasitələri, 10 komanda-idarəetmə və komanda-müşahidə məntəqəsi, 7 silah-sursat anbarı, 130-dan çox avtomobil texnikası, 1 ədəd “S-300” zenit-raket kompleksi.
Azərbaycanın Baş prokurorunun məlumatına görə, sentyabrın 27-dən etibarən Ermənistan silahlı qüvvələri tərəfindən yaşayış məntəqələrimizin atəşə tutulması nəticəsində 19 mülki şəxs – 3 qadın və 2 azyaşlı həlak olub, 63 dinc sakin müxtəlif dərəcəli bədən xəsarətləri alıb. Ermənistan silahlı qüvvələrinin dinc əhaliyə qarşı törətdiyi cinayətlərlə bağlı Baş Prokurorluq tərəfindən 12 cinayət işi başlanıb.
