44 günlük Vətən müharibəsinin başlamasından 4 il 33 gün ötür. Azərbaycan Ordusunun haqq savaşı nəticəsində torpaqlarımız erməni işğalçılarından təmizləndi.
Sumqayit24.az 2020-ci il oktyabrın 29-u, müharibənin 33-cü günündə baş verənlərin xronikasını təqdim edir:
Döyüş əməliyyatları əsasən cəbhənin Xocavənd, Füzuli və Qubadlı istiqamətlərində davam edib. Düşmənin hücum cəhdlərinin qarşısı qətiyyətlə alınıb. Ermənistan silahlı qüvvələrinin şəxsi heyəti arasında ölən və yaralananlar olub. Dəqiq atəş zərbələrinə tab gətirə bilməyən düşmən itki verərək geri çəkilməyə məcbur edilib. İşğalçı ordunun xeyli sayda canlı qüvvəsi, iki ədəd T-72 tankı, iki ədəd BM-21 “Qrad” yaylım atəşli reaktiv sistemi, 14 ədəd müxtəlif tipli top və bir neçə dayaq məntəqəsi ilə altı ədəd avtomobil texnikası sıradan çıxarılıb.
Ermənistan ordusunun yüksək rütbəli bir neçə zabiti məhv edilib.
Azərbaycan Ordusunun endirdiyi zərbələr nəticəsində Ermənistan silahlı qüvvələrinin bölmələri geri çəkilməyə məcbur edilir. Düşmən xeyli itki verir, onun döyüş texnikası sıradan çıxarılıb.
Azərbaycan Ordusunun Ermənistan silahlı qüvvələrinin genişmiqyaslı təxribatlarına cavab olaraq sentyabrın 27-də başladığı uğurlu əks-həmlə əməliyyatı nəticəsində indiyədək düşmənin xeyli sayda döyüş texnikası və hərbi sursatı məhv edilərək sıradan çıxarılıb və qənimət götürülüb. Düşmənin ümumi itkiləri 2,7 milyard dollar dəyərində qiymətləndirilib.
Ermənistan cəmiyyətində təşviş, ordusunda isə xaos, kütləvi fərarilik və özbaşınalıq hökm sürüb.
Ermənistan silahlı qüvvələri Azərbaycan ərazisinə 13 ballistik raket atıb.
Bərdədə mülki infrastruktur və dinc əhalini atəşə tutan düşmən bölmələri, işğalçı ordunun qüvvə və vasitələri Azərbaycan Ordusunun bölmələri tərəfindən darmadağın edilib.
Qubadlı istiqamətində Azərbaycan Ordusunun mövqelərinə aviazərbələr endirməyə cəhd göstərən Ermənistan silahlı qüvvələrinin iki Su-25 hücum təyyarəsi Hava Hücumundan Müdafiə bölmələrimiz tərəfindən məhv edilib.
Ermənistanın işğal olunmuş ərazilərimizdə mədəni sərvət və əmlakı məhv etməsi və talaması ilə bağlı cinayət işi başlanıb.
Ermənistanın təxribatları nəticəsində həlak olan mülki şəxslərin sayı 90-a çatıb, 392 nəfər xəsarət alıb.
