Sumqayıtda səhiyyə sistemi hələ də ciddi problemlərlə üzləşir. Xüsusilə, vətəndaşlar arasında ən çox şikayət edilən məsələlərdən biri tibbi xidmətin keyfiyətsizliyi və uzun növbələrdir.
Sumqayit24.az-ın keçirdiyi sorğu əsasında məlum olub ki, vətəndaşlar dövlət xəstəxanalarında sadə bir müayinədən keçmək və ya həkimlə məsləhətləşmək üçün saatlarla, bəzən günlərlə növbə gözləməli olurlar.
Bir xəstə həkimə müraciət etdikdən sonra, əgər həkim onu analizlərə göndərirsə, o zaman yenidən növbəyə durmaq və saatlarla gözləmək məcburiyyətində qalır. Xəstə artıq həkimlə görüşdükdən sonra analizlər üçün növbəyə yazılmalı və yenidən bu növbənin gəlməsini gözləməlidir. Bu gecikmələr, xüsusilə ağır xəstəliklərdən əziyyət çəkən insanlar üçün həyati təhlükə yaradır.
Səhiyyə müəssisələrində problem yalnız növbələrlə bitmir. Həkimlərin bir çoxu kifayət qədər diqqət göstərmədən, tələm-tələsik müayinə aparır. Bunun nəticəsində xəstələr dəqiq diaqnoz və müvafiq müalicə ala bilmirlər.
Bəzi vətəndaşlar bu problemlərdən çıxış yolu kimi özəl xəstəxanalara müraciət etsələr də, burada tibbi xidmətin qiyməti çox yüksəkdir. Sadə müayinə və analizlər belə bir çox ailə üçün əlçatmaz olur. Nəticədə, aztəminatlı insanlar dövlət xəstəxanalarındakı problemlərlə üz-üzə qalmağa məcbur olurlar.
