Sumqayıt şəhəri, Xəzər bağlarının dəniz istiqamətində yerləşən hissəsində antisanitar vəziyyət yaranıb.
Sumqayit24.az xəbər verir ki, ərazi məişət və tikinti tullantıları ilə dolub. Karton qutular, köhnə kreslolar, plastik butulkalar, tikinti materialları ilə dolu kisələr və digər müxtəlif tullantılar uzun müddətdir əraziyə atılıb.
Sakinlərin sözlərinə görə, tullantılar ərazidən daşınaraq təmizlənmək əvəzinə bəzi hallarda elə yerindəcə yandırılır. Bu isə həm ətraf mühitə, həm də insanların sağlamlığına mənfi təsir göstərir.
Qeyd edək ki, vətəndaşlar məsələ ilə bağlı artıq Ekologiya və Təbii Sərvətlər Nazirliyinə müraciət ünvanlayıblar. Sakinlər ərazinin tullantılardan tam şəkildə təmizlənməsini və belə halların təkrarlanmaması üçün müvafiq tədbirlərin görülməsini istəyirlər.
