Yetkinlik yaşına çatmayan qızın Sumqayıta qaçırıldığı ilə bağlı Ailə, Qadın və Uşaq Problemləri üzrə Dövlət Komitəsinə müraciət daxil olub. Bu haqda 7 iyul tarixində Sumqayıt24 komitəyə istinadən xəbər verir.
Müraciət 2005-ci il təvəllüdlü yetkinlik yaşına çatmayan qızın valideynləri tərəfindən məişət zorakılığına məruz qalması, erkən nikaha məcbur edilməsi ilə bağlıdır.
Müraciətə əsasən, Daxili İşlər Nazirliyinə və Gender zorakılığı və uşaqlara qarşı zorakılıq üzrə monitorinq qrupuna məlumat verilib.
Monitorinq qrupunun üzvləri dərhal ailənin evinə gediblər və yetkinlik yaşına çatmayan qızın evdən valideynləri tərəfindən çıxarıldığı və Sumqayıta qaçırıldığı məlum olub.
Lakin hüquq-mühafizə orqanlarının operativ əməliyyatı nəticəsində yetkinlik yaşına çatmayanın yeri müəyyən edilib və o, Abşeron rayon İcra Hakimiyyətinə gətirilərək izahatı alınıb. Onun istəyinə əsasən, təhlükəsizliyi təmin olunması məqsədilə sığınacağa yerləşdirilib.
Hazırda hüquq-mühafizə orqanları tərəfindən qanunvericilik çərçivəsində müvafiq araşdırma aparılır, həmçinin məişət zorakılığından zərər çəkmiş yetkinlik yaşına çatmayan şəxslə bağlı hüquqi, sosial xarakterli tədbirlər görülür.
