Baş Dövlət Yol Polisi İdarəsi (BDYPİ) küləkli hava şəraiti ilə bağlı hərəkət iştirakçılarına xəbərdarlıq edib.
İdarədən Sumqayit24.az-a verilən məlumata görə, xəbərdarlıqda deyilir:
“Sinoptiklərin məlumatına əsasən, hazırda ölkə ərazisində külək və yağışla müşahidə olunan əlverişsiz hava şəraiti aprelin 12-dək davam edəcək.
Baş Dövlət Yol Polisi İdarəsi, verilən xəbərdarlıqla əlaqədar yollarda yarana biləcək təhlükələrin qarşısının alınması məqsədilə hərəkət iştirakçılarına müraciət edərək, onlardan yola çıxarkən ehtiyatlı olmağı və qaydalara ciddi riayət etməyi xahiş edir.
Sürücülərə yağışlı və küləkli havalarda sürət həddini hava şəraitinə uyğun seçmək, qəfil manevrlərdən və kəskin tormozlamadan çəkinmək, zərurət olmadıqda ötmə əməliyyatı aparmamaq tövsiyə olunur.
Qoşqulu, tentli, uzunölçülü yük avtomobillərinin sahibləri və sürücüləri isə küləkli havada daşıdıqları yükün qablaşdırılmasına xüsusi diqqət yetirməlidirlər.
Nəqliyyat vasitələri sürüşmə, uçulma, qırılma, aşma ehtimalı yüksək olan obyektlərdən kənarda saxlanılmalı, park edilərkən isə qapalı məkanlara üstünlük verilməlidir.”
