Azərbaycanda nəqliyyat sahəsində "AYNA MaaS" adlı yeni rəqəmsal platforma istifadəyə verilib.
Sumqayit24.az-a Azərbaycan Yerüstü Nəqliyyat Agentliyindən verilən məlumata görə, tətbiq müxtəlif nəqliyyat növlərini — avtobus, metro, dəmiryolu, skuter və velosipedi — vahid mobil platformada birləşdirir.
Bu rəqəmsal nəqliyyat platforması istifadəçiyə bir tətbiq vasitəsilə müxtəlif nəqliyyat növləri arasından ən uyğun marşrutu seçməyə, səfər planlamasını həyata keçirməyə, ödəniş üsulları, real vaxt rejimində qrafik və nəqliyyatın gəlmə vaxtı barədə məlumat əldə etməyə imkan verir.
Mobil tətbiq Azərbaycan, ingilis və rus dillərində fəaliyyət göstərir.
Proqramda qeydiyyatdan keçmək üçün istifadəçi müvafiq bölməyə mobil nömrəsini yazaraq istifadə şərtləri və qaydaları ilə tanış olur. Növbəti bölməyə isə həmin nömrəyə SMS vasitəsilə göndərilən təsdiq kodu daxil edilir, daha sonra isə şifrə təyin olunur.
Qeyd olunur ki, "AYNA MaaS" hazırda ilkin versiya kimi təqdim olunub və istifadəçi rəy və təkliflərinə əsasən davamlı olaraq təkmilləşdiriləcək.
Mobil tətbiqi həm App Store, həm də Google Play Store-dan yükləmək mümkündür.
