Hər gün Bakıdan Sumqayıt və Saray qəsəbəsinə qayıdan tələbələr, işçilər və digər sakinlər ciddi çətinliklə üzləşirlər.
Sumqayit24.az-a daxil olan şikayətə əsasən, 20 Yanvar metro stansiyasının yaxınlığında avtobus tapmaq mümkün olmur və nəticədə onlarla insan yol kənarında uzun müddət gözləməyə məcbur qalır.
Məlumata görə, Bakı-Sumqayıt istiqamətində fəaliyyət göstərən və "manatlıq" kimi tanınan sərnişindaşıma avtobuslarının sürücüləri icazələri olsa da, avtobus zolağına daxil ola bilmirlər. Zolağa girdikləri halda sürücülərə 100 manat cərimə və 2 bal tətbiq edilir. Bu səbəbdən həmin marşrutların sayı azalıb.
Nəticədə bütün sərnişin axını 594 və 508 nömrəli avtobusların üzərinə düşür. Lakin bu marşrutlar minlərlə insanın tələbatını tam ödəməkdə çətinlik çəkir.
Sərnişinlər məsul qurumlardan problemin həll edilməsini tələb edirlər.
