Sumqayıt şəhərinin “Betonzavod” adlanan ərazisində antisanitariya vəziyyəti yaranıb. Sumqayıt24 bu barədə 24 yanvar tarixində xəbər verir.
Sakinlərin sözlərinə görə, məişət tullantıları günlərdir yığışdırılmayıb. Məişət tullantıları üçün qutular olmadığından sakinlər zibili boş əraziyə tökürlər. Zibil vaxtlı-vaxtında təmizlənmədiyindən bura heyvanların məskəninə çevrilib.
Sumqayıt təmizlik departamenti MMC-dən ATV News-a bildirildi ki, ərazidə yaşayan sakinlər bu günə kimi məişət tullantıları ilə bağlı heç bir ödəniş etməyiblər.
“Dəfələrlə ora müfəttişlər göndərilsə də, burada yaşayan sakinlər ödəniş etməkdən imtina ediblər. Biz mütəmadi olaraq, ağır texnika vasitəsilə zibilləri təmizləyirik. Buna baxmayaraq, əhali yenidən tullantıları həmin əraziyə atır”, - deyə MMC-nin əməkdaşı İlyas Ağayarov söyləyib. O, həmçinin bildirib ki, yaxın günlərdə əraziyə yeni zibil qutuları qoyulacaq.
