Sumqayıtda 30 ailəni antisanitar vəziyyət narahat edir. Sumqayıt24 bu haqda Xezerxeber.az-a istinadən xəbər verir.
Məlumata görə, Ceyranbatan bağları massivində kanalizasiya sistemi yoxdur və çirkab sular ətrafa axıdılır. Bu səbəbdən ərazi üfunət saçan böyük gölməçələrlə doludur.
Sakinlərin sözlərinə görə, kanalizasiya suları onların evlərinə qədər gəlib çatıb: “Ceyranbatanda olan bütün çirkab sular boru vasitəsilə əraziyə axıdılır. Hələ indi yaxşıdır, qışda bu yol ümumiyyətlə keçilməz olur”.
Vəziyyətlə yaxından tanış olmaq üçün buraya gələn Sumqayıt Sukanal İdarəsinin əməkdaşları bildirib ki, kanalizasiya suları sakinlər tərəfindən boru vasitəsilə gölə axıdılır. Qeyd olunub ki, kanalizasiya sistemi layihəsi aidiyyəti üzrə təqdim edilib və yaxın gələcəkdə kanalizasiya xətləri inşa ediləcək.
