Ceyranbatan su anbarının ətrafında yaşıllıq günbəgün azalır. Bu barədə 1 fevral tarixində Sumqayıt24 xəbər verir.
Sakinlərin sözlərinə görə, bir neçə il əvvəl burada sıx ağaclıq var idi. Lakin indi ağaclar o qədər seyrəlib ki, anbarın suyu kənardan müşahidə olunur. Onlar iddia edirlər ki, ərazi suvarılmır.
Fövqəladə Hallar Nazirliyi (FHN) mövzu ilə bağlı Bizim.Media-nın sorğusunu cavablandırıb. Bildirilib ki, son illər ərzində meşə ərazilərinin müəyyən seyrəlməsi prosesləri müşahidə olunur:
“Bu seyrəlmənin səbəbləri bir sıra obyektiv və subyektiv amillərlə bağlıdır. Obyektiv səbəblər iqlim dəyişiklikləri, o cümlədən son illərin quraqlığı, torpaqların şoranlaşması, təbii erroziya prosesinin genişlənməsi, Ceyranbatan meşəçiliyinin, əsasən, gilli ərazilərdə yerləşməsi, eləcə də meşə sahələrinin xeyli hissəsinin yaşlı, fiziki ömrünü başa çatdırmaqda olan ağaclardan ibarət olmasıdır”.
Qeyd olunub ki, Ceyranbatan meşəçiliyi ötən əsrin 60-cı illərində yaradılıb və ağacların böyük bir qisminin yaşı 70 ilə yaxındır:
“Ceyranbatan su anbarı ərazisində yerləşən Ceyranbatan meşəçiliyi Fövqəladə Hallar Nazirliyinin balansına 2016-cı ildə verilib. Ötən 7 il ərzində Ceyranbatan su anbarının meşə sahələrinə gündəlik rejimdə mümkün olan bütün aqrotexniki xidmətlər göstərilib, əksər meşə sahələrinin mütəmadi suvarılması təşkil edilib. 160 hektara yaxın yeni meşə ərazisi salınıb, 150 hektarda damlama üsulu ilə suvarma sistemi qurulub. Hazırda meşəçilik ərazisindəki istifadədə olan bütün nasosxanalar işlək vəziyyətdədir”.
Son olaraq bildirilib ki, Ceyranbatan su anbarı ərazisində 10.000 ədəd ağac əkiləcək.
