Xaricdən maşın gətirmək istəyən Sumqayıt sakinləri dələduzluğun qurbanı olublar.
Belə ki, Şahin Vahid oğlu İbrahimov qardaşları ilə birgə Çindən avtomobil almaq istəyib. Lakin əməkdaşlıq etdikləri Fuad Cəfərzadə pulu götürdükdən sonra zənglərə cavab verməyib.
Şahin İbrahimov qeyd edib ki, onlara 60 min manat dəyərində ziyan dəyib.
"Biz üç qardaş (Şahin, Elçin, Samiq) Çindən maşın almaq üçün Fuad Cəfərzadə ilə əməkdaşlıq etdik. Əvvəlcə ona 30 min dollar pul verdik. Bundan əlavə, 7 700 manatı isə gömrük və qeydiyyat üçün lazım olan vəsait kimi bizdən aldı. Maşınların gəlməsinə bir gün qalmış Fuad Cəfərzadə bizdə gömrük məsələlərini həll etmək üçün ödənişi və lazımi bütün sənədləri götürüb getdi.
Bizə isə səhər saat 10-da yaxınlaşıb qeydiyyat prosesini həll etməyimizi dedi. Lakin həmin günün axşamı biz onunla əlaqə saxlamaq istəyəndə zənglərimizi açmadı, telefonuna zəng çatmadı, "WhatsApp" mobil tətbiqindən ona yazdıq, lakin bundan sonra o bizi bloka atdı. Sonradan atasını tapıb oğlunun yerini soruşduq, dedi ki, "gedin nə edirsiniz, edin, mən bilmirəm", atası oğlunun yerini bilir, lakin gizlədir. Biz məsələ ilə əlaqədar Sumqayıt Şəhər Polis İdarəsinin 4-cü Polis Şöbəsinə müraciət etmişik.
Bu olanlardan sonra biz dələduzun fotosunu sosial mediada paylaşdıq. Paylaşımdan sonra 50-60 nəfər bizə yazdı. Onlar deyirdilər ki, fotodakı şəxs dələduzdur, həmin şəxslərə də 10-30 min manat aralığında ziyan vurub".
Daxili İşlər Nazirliyinin Mətbuat Xidmətinin əməkdaşı Cəsarət Qənbərli Sumqayit24.az -a açıqlamasında bildirib ki, vətəndaşların "xarici ölkədən avtomobil gətirmək" vədi ilə Fuad Elxan oğlu Cəfərzadə tərəfindən aldadılaraq pul vəsaitlərinin ələ keçirilməsi ilə bağlı müraciətlər araşdırılır:
"Faktlar üzrə zərərçəkənlərə dəyən zərərin miqdarı 58 700 manat təşkil edir. Hazırda əməli törətməkdə şübhəli bilinən şəxsin müəyyən olunaraq məsuliyyətə cəlb edilməsi üçün tədbirlər görülür".
