Sumqayıtda "Daşkənddən Qarabağa könül körpüsü" adlı ədəbi-bədii gecə keçirilib. Bu haqda 19 dekabr tarixində Regional Mədəniyyət İdarəsi (RMİ) xəbər yayıb.
Muğam mərkəzində baş tutan tədbirdə Milli Məclisinin Mədəniyyət Komitəsinin sədri Qənirə Paşayeva, Özbəkistanın ölkəmizdəki səfirliyinin nümayəndələri, millət vəkili Müşfiq Məmmədli, İcra Hakimiyyəti başçısının birinci müavini Teymur Səmədov, Nizami adına Daşkənd Dövlət Pedaqoji Universitetinin rektoru Abdulqafor Kirgizbayev, Sumqayıt RMİ-nin rəisi Rəşad Əliyev və şəhər ziyalıları iştirak ediblər.
Çıxış edənlər iki dövlət arasında tarixi bağlılıqdan, Azərbaycan və Özbəkistan arasında əlaqələrin inkişafından bəhs ediblər. Çıxışlardan sonra iştirakçılara “Özbəkistan-Azərbaycan” Dostluq Cəmiyyətinin Fəxri fərmanı verilib.
Sonda Azərbaycan və Özbəkistanın xalq artisti Gülyanaq Məmmədova və Beynəlxalq müsabiqələrin qalibi, Əməkdar artist Sahib Paşazadənin ifaları dinlənilib.
Qeyd edək ki, tədbir Milli Məclisinin Mədəniyyət Komitəsi, Özbəkistandakı Heydər Əliyev adına Azərbaycan Mədəniyyət Mərkəzi, Sumqayıt Şəhər İcra Hakimiyyəti və Sumqayıt Regional Mədəniyyət İdarəsi tərəfindən təşkil olunub.
