"Sumqayıt şəhərinin adı gələndə qardaşımla olan xatirələrim yadıma düşür və bu yaşımda onun həsrətini çəkirəm".
Bu sözləri jurnalist, təqdiqatçı, yazıçı Dilqəm Əhməd Kulis.az-a müsahibəsi zamanı deyib.
Qeyd edək ki, Dilqəm Əhməd İrəvan şəhərində anadan olub. 1988-ci ildə isə ailəsi İrəvandan deportasiya edilib və onlar Sumqayıt şəhərinə köçüblər. Tədqiqatçı müsahibə zamanı Sumqayıtla bağlı xatirələrini də bölüşüb.
"İrəvandan köçümüzü xatırlayıram. Öncə Naxçıvana gəlmişdik. Daha sonra Sumqayıta köçdük. Sumqayıt şəhəri həyatımda heç vaxt unuda bilməyəcəyim bir yerdir. Xeyli məhəllə oyunlarımız vardı, qonşu uşaqlar arasında mehribanlıq vardı. Çilingağac, aşıq oyunları indi sanki neolit dövrünü xatırlatsa da, biz bunların hamısını yaşamışıq. Həyətdə ocaq qalayıb, qurğuşun əridib aşığın içinə tökən nəsli müasir tablet nəsli, əlbəttə ki, anlamaz. Şübhəsiz ki, indiki uşaqların şansları bizdən yüz qat çoxdur, amma fikrimcə, biz daha xoşbəxt, daha sosial idik. Sumqayıtı bu baxımdan hər zaman böyük hisslərlə xatırlayıram. Amma təəssüf ki, uşaqlıq dostumu, qardaşımı Sumqayıtda itirdim. Ona görə də həmişə bu şəhərin adı gələndə qardaşımla olan xatirələrim də yadıma düşür və bu yaşımda da onun həsrətini çəkirəm".
