Fövqəladə Hallar Nazirliyinin Sumqayıt Regional Mərkəzinin əməkdaşı gümüş medala layiq görülüb.
Sumqayit24.az Nazirliyə istinadən xəbər verir ki, 28-29 noyabr 2025-ci il tarixlərində Daxili İşlər Nazirliyinin təşkilatçılığı, Azərbaycan Cüdo Federasiyasının dəstəyi ilə DİN-in İdman Cəmiyyətində dövlət qurumlarının xüsusi rütbəli əməkdaşları arasında "Antiterror əməliyyatı" şəhidlərinin xatirəsinə həsr olunmuş cüdo üzrə açıq çempionat keçirilib.
Yarışda 11 dövlət qurumundan 65-ə yaxın əməkdaş iştirak edərək əzmkar mübarizə aparıblar.
Yarışda iştirak edən FHN-nin kişilərdən ibarət cüdo üzrə komandasının üzvləri İdman-sağlamlıq klubunun əməkdaşı mayor Fərid Ağakişiyevin rəhbərliyi altında yüksək nəticələr əldə ediblər. Belə ki, 60 kq çəki dərəcəsində Sumqayıt Regional Mərkəzinin əməkdaşı baş çavuş Ozal Dünyamalıev gümüş medala layiq görülüb.
Qaliblərə DİN-in təsis etdiyi medal və diplomlar təqdim edilib.
