Sumqayıtda avtobusdakı baxımsızlıq sərnişinlərin narazılığına səbəb olub.
Sumqayit24.az-a daxil olan məlumata görə, 5 nömrəli marşrut üzrə hərəkət edən avtobusda şəraitsizlik müşahidə olunur. Vətəndaşların bildirdiyinə görə, nəqliyyat vasitəsində istilik sistemi işləmir, salonun işıqlandırması da bərbaddır.
Bundan başqa, avtobusun qapıları da düzgün fəaliyyət göstərmir. Sərnişinlərin sözlərinə görə, qapılar çox vaxt açıq qalır ki, bu da xüsusilə soyuq havalarda təhlükə və narahatlıq yaradır.
"Çox vaxt qapı açıq vəziyyətdə qalır. Qeyd edim ki, videoda nəqliyyat vasitəsi dayanacaqda deyil, işıqforda dayanıb. Sonra bəhanə gətirməsinlər. İstilik yoxdur, qapılar bağlanmır. Bu soyuqda niyə belə şəraitsizliklə üzləşməliyik?" – deyə sərnişinlərdən biri narazılığını ifadə edib.
Vətəndaşlar aidiyyəti qurumlardan 5 nömrəli marşrut avtobusunda mövcud problemlərin aradan qaldırılmasını tələb edirlər.
