Novxanı qəsəbəsində pis vəziyyətdə olan yol təmir ediləcək. Sumqayıt24 bu haqda bu gün, 24 fevral tarixində RealTV-yə istinadən xəbər verir.
Söhbət Dostluq küçəsindən gedir. Burada, yol örtüyünün asfaltsız olmasından əlavə, ərazidən tullantılarla dolu Samur-Abşeron su kanalı keçir. Bu səbəbdən ətrafı xoşagəlməz qoxu bürüyür.
Novxanı Bələdiyyəsinin sədri Şahin Tağıyev bu barədə açıqlamasında bildirib ki, bu yolun cari il ərzində əsaslı təmir olunacağı nəzərdə tutulub. Məişət tullantıları məsələsinə gəldikdə isə, onların daşınması üçün ayrılmış 2 ədəd maşın var. Həmçinin, “Təmiz şəhər” ASC ilə də müqavilə bağlanılıb.
Onun sözlərinə görə, tullantıların daşınması prosesi müəyyən günlərdə həyata keçirilir. Həmin günlərdə əməkdaşlar, sakinlərin evlərini qapı-qapı gəzərək yığılmış zibili daşıyırlar.
