Sumqayıtın bir çox ərazilərində yağış barmaqlıqları və kanalizasiya qapaqları yoxa çıxır. Bu barədə 3 dekabr tarixində Sumqayıt24 xəbər verir.
Bu səfər naməlum şəxslər Azərbaycan prospekti boyunca yağış barmaqlıqlarını oğurlayıblar. Nəticədə avtomobillər üçün ciddi təhlükə yaranıb.
Məsələ ilə bağlı Sumqayıt Sukanal İdarəsindən Xeberle.com-a açıqlama verilib. Bildirilib ki, belə hallara daha çox mərkəzi küçələrdə və ətraf qəsəbələrdə rast gəlinir. Həmin kanalizasiya qapaqları və barmaqlıqlar daha sonra metal qəbulu məntəqələrinə satılır:
”Bəzi insanların asan yolla qazanc əldə etmək üçün törətdiyi bu əməllər idarəni əlavə xərclərlə üzləşdirməklə yanaşı, kanalizasiya infrastrukturunun istismarını çətinləşdirir. Kanalizasiya quyularının açıq qalması, xüsusilə gecə saatlarında sürücülər və piyadalar üçün ciddi təhlükə yaradır”.
Faktlarla bağlı idarə tərəfindən hüquq-mühafizə orqanına və digər aidiyyəti təşkilatlara müraciətlər olunub. Təhlükə mənbəyi olan ağzıaçıq quyulara qapaqlar qoyulacaq.
