Ali Məhkəmədə zorlamada təqsirləndirilən Gülgün Kərimovun (adı, soyadı şərtidir) barəsindəki qərardan verilən kassasiya şirkəti üzrə məhkəmə iclası başa çatıb.
Pravda.az-ın məlumatına görə, hakim İlqar Qılıcovun sədrliyi ilə keçirilən prosesdə qərar elan olunub.
Qərara əsasən, şikayət təmin edilməyib.
İttihama görə, hadisə 2021-ci il tarixində, gecə saatlarında Rusiya Federasiyasının Primorsk diyarında yerləşən "Novaya Sila" kəndi ərazisində qeydə alınıb.
Belə ki, sərxoş vəziyyətdə olan Gülgün Kərimov yetkinlik yaşına çatmamış qıza qarşı zor tətbiq etməklə cinsi xarakterli hərəkətlər edib.
İstintaq materiallarına əsasən, təqsirləndirilən şəxs qəsdən hərəkət edərək, zərərçəkmişin yetkinlik yaşına çatmadığını etibarlı şəkildə bildiyi halda, onu yerə yıxaraq fiziki zor tətbiq edib, müqavimətini qırmağa çalışıb və bu zaman müxtəlif bədən xəsarətləri yetirib.
Hadisə nəticəsində zərərçəkmiş şəxsin bədənində qançır və digər xəsarətlər qeydə alınıb. İstintaq orqanları qeyd edir ki, təqsirləndirilən şəxs zərərçəkmişin iradəsinə zidd olaraq onun cinsi azadlıq hüququnu pozub.
Sumqayıt Ağır Cinayətlər Məhkəməsinin hökmü ilə Gülgün Kərimov 8 il müddətə azadlıqdan məhrum edilib. Sumqayıt Apellyasiya Məhkəməsinin qərarı ilə hökm apellyasiya şikayətinə münasibətdə dəyişdirilmədən saxlanılıb.
