Rüşvət almaqda ittiham olunan sabiq hakimin cinayət işi üzrə məhkəmə istintaqı başlayıb. Sumqayıt24 bu barədə 1 noyabr tarixində Apa.az-a istinadən xəbər verir.
Sumqayıt Ağır Cinayətlər Məhkəməsində hakim Fəhmin Hümbətovun sədrliyi ilə keçirilən iclasda ittiham aktı elan olunub.
İttiham olunan şəxs İlyas Mahmudov 2008-2019-cu illərdə Sumqayıt şəhər Məhkəməsində hakim vəzifəsində çalışıb. O, hakim olarkən icraatında olan müxtəlif mülki işlər üzrə iddiaçıların tələblərinin təmin edilməsi barədə bilərəkdən ədalətsiz qətnamə qəbul etməsi müqabilində ayrı-ayrı şəxslərdən rüşvət qismində pul tələb edib. Bununla əlaqədar o, bilərəkdən 2 halda ədalətsiz qətnamə çıxarıb.
Bundan əlavə, İ.Mahmudov işlədiyi dövr ərzində icraatında olan digər işlər üzrə qəbul etdiyi 25 qətnaməyə əvvəlcədən bilə-bilə yalan məlumatlar daxil edib. İttihama görə, İ. Mahmudovun cinayət işi üzrə dəymiş ziyan 214 min manat müəyyən olunub.
Toplanmış dəlil və sübutlarla sabiq hakim “bilə-bilə ədalətsiz hökm, qətnamə, qərardad və ya qərardad çıxarma”, “ağır nəticələrə səbəb olan vəzifə səlahiyyətlərindən sui-istifadə”, “təkrar rüşvət alma” və “vəzifə saxtakarlığı” maddələri ilə ittiham olunub.
İş üzrə Dövlət Sosial Müdafiə Fondu zərərçəkmiş qismində tanınıb.
İttihama münasibət bildirən İ.Mahmudov özünü təqsirli bilməyib.
O, barəsindəki ittihamları tamamilə təkzib edib.
Proses noyabrın 14-də davam etdiriləcək.
