Sumqayıtda piyada keçidi olduğu halda, sakinlər yolun hərəkət hissəsi ilə gedirlər. Sumqayıt24 bu haqda bu gün, 21 aprel tarixində XəzərTV-yə istinadən xəbər verir.
Məlumata əsasən, Üzeyir Hacıbəyov küçəsində piyada zolağının axırında ağaclar və dekorativ güllər əkilib. Nəticədə yolu keçən piyadalar yenidən yolun hərəkət hissəsinə çıxmalı olurlar.
“Bu gülləri mən əkmişəm. Zolaq çəkilən zaman təklif etdim ki, “zebranı” 2 metr aralıda çəksinlər”, - deyə sakin bildirib.
''Sözügedən piyada zolağı ilə bağlı bizə heç bir məlumat daxil olmayıb. Ağaclar və dekorativ güllər isə zolaq çəkildikdən sonra əkilib. Əraziyə yenidən baxış keçiriləcək, yaranmış çətinliyin aradan qaldırılması istiqamətində tədbirlər görüləcək'', - deyə Baş Dövlət Yol Polisi İdarəsi Sumqayıt "Siqnal" İxtisaslaşdırılmış Layihə-İstehsalat İdarəsindən bildirilib.
