Sumqayıtda sudan qanunsuz istifadə halları aşkarlanıb. Sumqayıt24 bu haqda 2 yanvar tarixində "Azərsu" ASC-yə istinadən xəbər verir.
Vətəndaşa məxsus donuzçuluq təsərrüfatının özbaşına çəkilmiş xətt vasitəsilə su ilə təchiz olunduğu məlum olub. Təsərrüfat sahibi texniki şərt almadan və “Azərsu” ilə müqavilə bağlamadan sudan bolluca istifadə edir.
Bildirilir ki, 8-ci mikrorayonda kafe kimi fəaliyyət göstərən 2 obyektin də su təchizatı özbaşına çəkilmiş xətt vasitəsilə aparılır. Obyekt sahibləri binanın zirzəmisindən su götürürmüş:
"Nəzarət tədbirləri zamanı bir sıra fərdi yaşayış evlərinin də içməli su şəbəkəsinə qanunsuz qoşulduğu aşkarlanıb. Belə ki, fərdi yaşayış evlərinin tikintisi ilə məşğul olan şəxslər yaxınlıqdan keçən su xəttindən bir neçə yaşayış evinə qeyri-qanuni su xətti çəkiblər”.
Aşkarlanmış qeyri-qanuni xətlər və birləşmələr ləğv edilib. Ev və obyekt sahiblərinin nəzərinə çatdırılıb ki, belə halları təkrar törədənlərlə bağlı hüquq-mühafizə orqanlarına müraciət ediləcək.
